ایران افغانستان ته د باروړونکو موټرو پر تللو ۲۰ ورځنی بندیز لرې کړ

د ایران د خراسان رضوي د لویو لارو او ترانسپورت عمومي مشر د اسلام کلا پولې ته د ایراني باروړونکو موټرو د ننوتلو شل ورځنی بندیز بېرته لرې کړ. جعفر شهامت ویلي، دغه هوکړه د دوغارون په پوله کې د سرپرست حکومت او ایراني پلاوي په ګډه غونډه کې شوې ده. د سرپرست حکومت او ایران د استازو اقتصادي غونډه د یکشنبې په ورځ د دوغارون پر پوله تر سره شوه. په دې ناسته کې د افغان او ایراني موټر چلوونکو په ځینو ګمرکي ستونزو او ننګونو هم خبرې شوې دي. فارس خبری آژانس د خراسان رضوي د لویو لارو او ټرانسپورټ د عمومي مشر له قوله لیکلي، په دغې غونډه کې په سملاسي توګه هرات او اسلام کلا ته د ایراني باروړونکو موټرو په تګ راتګ د شل ورځني بندیز د لېرې کولو پرېکړه وشوه.