ایران په۱۰ ورځو کې ۱۸زره افغان کډوال افغانستانه ته لېږلي

ایراني چارواکي وايي چې په لسو ورځو کې یې شاوخوا ۱۸ زره افغان کډوال افغانستانه ته لېږلي دي. مهر خبري اژانس د دغه ولایت د پولیسو د مشر مجید شوکا له قوله ویلي، دا افغانان د دوغارون بندر له لارې افغانستان ته ولېږدول شول. په ورته مهال ، د ایران د کورنیو چارو وزیر احمد واحدي ادعا کړې چې په ایران کې تر ۵ میلیونه ډېر افغانان مېشت دي. په وروستیو کې له ایران څخه د افغان کډوالو د په زوره ستنولو خبرونه زیات شوي. د بشري حقونو اړوند یو شمېر نړیوالو بنسټونو بیا بیا د افغانستان له ګاونډیانو او نورو سیمه ییزو هېوادونو له افغان پناه غوښتونکو سره پر ښه چلند ټینګار کړی.