ا.ا بهرنیو هېوادونو ته د څارویو پر لېږد بندیز لګولی دی

د افغانستان ا.ا بهر ته د څارويو پر صادراتو بنديز لګولی دی. د ا.ا د سوداګرۍ او صنايعو وزارت وايي چې دا پريکړه پرون د سوداګرۍ او کرنې وزارتونو د استازو تر منځ ناسته کې شوې ده. د سوداګرۍ وزارت يوه خبرپاڼه وايي چې د دواړو وزارتونو استازو پرېکړه کړې چې په ګډه به له امنيتي مسوولينو وغواړي چې بهر ته د څارويو د صادراتو مخنيوی وکړي. سرچينې دا نه دي ويلي چې د څارويو پر صادراتو ولې بنديز لګول شوی خو، تر دې وړاندې داسې راپورونه ورکول کيدل چې له هيواده څاروي ګاونډيو هيوادونو، په ځانګړي ډول ايران ته قاچاق کيږي چې دې چارې په کور د ننه د غوښو بیې لوړې کړې دي.