معترضین: حکومت دې د پنځم مکروریانو پروژې بشپړتیا لپاره خپل مسوولیت ادا کړي

د ښار جوړونې وزارت اړوند پنځمو مکروريانو پروژې د اپارتمانونو مالکانو له دغه وزارته غوښتي چې ستونزې يې ور هوارې کړي. دوی وايي، ساختماني شرکتونو ترې کلونه مخکې د اپارتمانونو د پېرلو لپاره يو يا دوه قسطه پيسې اخيستې دي خو اپارتمانونه يې نه دي ورسپارلي. دوی وايي چې د پروژې کارونه په داسې حال کې په ټپه ولاړ دي چې ډيری اپارتمانونه يې له وړاندې د نقشې پر مخ پلورل شوي دي. هغوی له ښارجوړونې وزارته غوښتي چې د خپلو مسووليتونو په چوکاټ کې د دوی ستونزې ته د حل لاره ومومي. د ښار جوړونې او ځمکو وزير ويلي چې د پنځمو مکروريانو په پروژه کې د شته ستونزو د هوارولو هڅه کوي. هغه ويلي چې د پروژې په هوکړه لیک کې د طرفینو مسولیتونه مشخص دي او د ښار جوړولو وزارت د خپلو مسولیتونو ترسره کولو ته ژمن دی.