بریتانیا راتلونکي کال کې ۳۵۰۰ نورو افغانانو ته پناه ورکوي

د بریتانیا حکومت غواړي هغه ۱۰ زره افغانان چې له کابله دې هېواد ته لېږدول شوي او د بریتانیا په هوټلونو کې استوګن دي، د محصلینو لیلیو ته ولېږدوي. د بریتانیا د کورنیو چارو وزارت نن د هغو کسانو د شمېر جزیات خپاره کړي، چې یو کال مخکې پر افغانستان د ا.ا له واکمنېدو وروسته ایستل شوي وو. بریتانیا حکومت وايي، له افغانانو سره کړیو ژمنو ټینګ ولاړ دي. د دې معلوماتو له مخې تمه کېږي، بریتانیا کې به راتلونکی کال داسې ۳۵۰۰ افغانان ومنل شي، چې له احتمالي خطر سره مخامخ دي. تېر کال چې افغانستان کې ا.ا واکمن شو، بریتانیايي چارواکو ژمنه وکړه، چې د پنځو کلونو موده کې به ۲۰ زره افغانان بریتانیا کې مېشت کړي. هغه شمېرې چې نن خپرې شوې ښيي چې اوس هم له افغانستانه بریتانیا ته لېږدول شوي، ۹۶۶۷ کسان په ۶۶ هوټلونو کې په موقت ډول استوګن دي.