بهرنیو چارو وزارت: چین او پاکستان له طالبانو د تاوتریخوالي کمښت غوښتنه کړې

نن په کابل کې د چین، پاکستان او افغانستان تر منځ د سیمه ییزې اجماع پیاوړتیا په موخه درې اړخیز ویډیویي کنفرانس تر سره شوی دی. د بهرنیو چارو وزارت ویاند ګران هېواد وایي، چین او پاکستان په دې ویډیویي کنفرانس کې د حکومت له لوري د سولې بین الافغاني مذاکراتو ژر پیل لپاره د طالب زندانیانو خوشې کېدل ستایلي او پر طالبانو یې غږ کړی دی چې د تاوتریخوالي په کمولو سره دې ژر له افغان حکومت سره د خبرو زمینه برابره کړي. هېواد وایي، چې افغان حکومت د سولې لپاره تر خپله وسه هر څه کړي او اوس د طالبانو وار دی چې دې برخه کې اړین اقدامات وکړي. ګران هېواد دغه راز څرګنده کړې چې د سولې نړیوالې اجماع پیاوړتیا لپاره بله ناسته به د ۲۰ هېوادونو په ګډون د روانې میاشتې په ۱۹ مه د ولسمشر غني په مشرۍ په ارګ کې جوړه شي.