بېنېټ: افغان سرپرست حکومت دې اساسي بشري حقونو ته پام وکړي

د افغانستان لپاره د ملګرو ملتونو ځانګړی راپور ورکوونکی ریچارډ بېنېټ وايي د جرمونو له نړیوالې محکمې یې غوښتي چې له ښځو سره د جنسیت له مخې د ط البانو د چلند او ځورونې په اړه غور وکړي. د ا.ا د اقتصاد وزارت د یو مکتوب له لارې ښځې په داخلي او بهرنیو غیردولتي موسسو کې له کار کولو منع کړې دي. له دې څو ورځې وړاندې د لوړو زدکړو وزارت د افغانستان ټولو دولتي او خصوصي پوهنتونونو ته امر وکړ چې د نجونو زده کړې وځنډوي. بېنېټ وايي پر ښځو او نجونو بندیزونه د بشري حقونو څخه سرغړونه ده او خبرداری یې ورکړ چې دغه موضوع په جدي ډول تعقیبوي. دا په داسې حال کې ده چې د ملګرو ملتونو خیریه سازمانونو خبرداری ورکړی چې په روان ژمي کې د میلیونونو افغانانو ژوند په بېړنیو بشري مرستو پورې تړلی دی. د ملګرو ملتونو ځانګړی راپور ورکوونکی وايي، پر طالبانو یې غږ کړی اساسي بشري حقونو ته پام وکړي او د نجونو پر زده کړه د بندیز پرېکړه بېرته واخلي.