تاجکستان افغانستان ته څېرمه؛ امنیتي تدابیر ډېر او لا ډېر سرتېري یې ځای پر ځای کړي

تاجکستان وایي له افغان پولې سره یې څېرمه لا ډېر سرتېري ځای پر ځای کړي دي. د راپورونو له مخې د تاجکستان امنیتي او دفاعي چارواکو ویلي دوی غواړي له افغانستان سره پر پوله امنیتي تدابیر لا ډېر کړي له همدې امله یې په دغه سیمه کې لا ډېر سرتېري ځای پر ځای کړي دي. دوی دغه راز ویلي چې په سیمه کې د امنیتي ځواکونو ترمنځ نظامي تمرینات هم پيل شوي دي چې دوی د احتمالي ګواښونو د پېښېدو لپاره تیاری ولري. تر دې وړاندې هم تاجکستان له افغانستان سره څېرمه په خپلو سرحدي سیمو کې د سختو امنیتي تدابیرو او پوځي تمریناتو خبر ورکړی و. دوی وایي چې د مرکزي اسیا ځينې وسله والې ډلې او په افغانستان کې مېشتې ترهګرې ډلې ښایي تاجکستان ته امنیتي ګواښونه جوړ کړي.