تېر کال په کابل کې ۸۳ کیلومتره سړکونه جوړ شوي دي

د کابل ښاروالۍ مسوولینو د خپلو يو کلنو لاسته راوړنو د تشريح پروګرام کې وویل، چې تېر کال په پلازمېنه کابل کې ټول ټال د ۸۳ کيلومتره په اوږدوالي بېلابېل اصلي او فرعي سړکونه جوړ شوي دي، چې په دې په تېرو ۳ کلونو کې په پلازمېنه کې د جوړ شویو سړکونو اوږدوالی ۳۲۳ کيلو مترو ته ورسېد. د کابل ښاروالۍ استازي نعمت الله بارکزي وویل، چې کابل ښاروالۍ په همدې موده کې د ۱۲۰ نویو پروژو تخنیکي اسناد ترتیب کړي او له ۸۰۰ زیات د ودانۍ جوازونه یې صادر کړي دي. د بارکزي په وینا، د ټولګټو پروژو د تطبیق لپاره په کابل ښار کې یو زر او ۸۶ ملکیتونه استملاک شوي او شاوخوا یو میلیون د ونو نیالګي هم کېنول شوي دي.