حامد کرزي یو ځل بيا د نجونو ښوونځيو په پرانيستلو ټينګار کړی

د هیواد پخواني ولسمشر حامد کرزي د افغانستان لپاره د جاپان د ځانګړي استازي له مرستیالې میساکو تاکاهاشي سره په کتنه کې یو ځل بیا د نجونو ښوونځیو او پوهنتونونو په پرانیستلو ټینګار کړی دی. د ښاغلي کرزي په اېکس پاڼه په یوه لیکلي بیان کې ویل شوي، چې په دې لیدنه کې د کابل او توکیو ترمنځ د اړیکو پر لا پیاوړتیا خبرې شوې دي. همدا راز پخواني ولسمشر په هېواد کې د دايمي سولې او ثبات د تامين لپاره د ملي ډيالوګ پيل هم اړین بللی او د دې ترڅنګ یې  د افغانستان له خلکو سره د جاپان له مرستو هم مننه کړې ده. پخواني ولسمشر حامد کرزي په داسې حال کې یو ځل بیا د نجونو د ښوونځيو او پوهنتونو په پرانیستلو ټینګار کړی، چې د سرپرست حکومت واک ته تر رسېدو وروسته په ټول هیواد کې تر ۶ ټولګي پورته د نجونو پر زده کړو تر امر ثاني بندیز لګېدلی دی او ښاغلي کرزي یې په څو څو ځله د پرانیستلو غږ پورته کړی دی.