خوست کې هدفي وژنو خلک اندېښمن کړي دي

په تېرو څو اونيو کې په خوست ښار کې یو شمېر کسان په هدفي ډول وژل شوي دي او وروستۍ پېښه یې درې ورځې وړاندې د خوست ښار سپین جومات سره وشوه، چې په یوه وسله وال برید کې څلور کسان ووژل شول. ځایي خلک په خوست ښار کې وروستیو وژنو اندېښمن کړي دي. دوی وايي د امنیتي ځواکونو په شتون کې وسله وال څنګه د ښار په منځ کې خلک ترور کولی شي. په ولسي جرګه کې د خوست د خلکو استازي کمال ناصر اصولي هم د خوست ښار د امنیت خرابېدو په اړه اندېښنه ښودلې ده. نوموړي ویلي په تېرو څلور میاشتو کې په خوست ښار کې ۲۰ تنه امنیتي منسوبین ترور شوي دي. د خوست مرستیال والي عبدالواحد پټان ویلي، چې دوښمن د مخامخ جګړې توان نه لري او ځینې وختونه له شا څخه ګوزار کوي. نوموړی د خوست امنیتي حالت د ډاډ وړ بولي.