د اسلامي همکارۍ سازمان؛ د لوړو زده‌کړو وزارت سره د همکارۍ ژمنه کړې

د لوړو زده کړو وزارت خبر ورکړی، چې د دغه وزارت وزیر شیخ نداء محمد ندیم د اسلامي همکاریو سازمان د سرمنشي له مرستیال او د افغانستان لپاره د یاد سازمان له ځانګړي استازي دوکتور طارق علي بخیت او مل پلاوي سره کتلي دي. سرچینې ویلي، چې په دې کتنه کې د اسلامي همکارۍ سازمان د سرمنشي مرستیال ژمنه کړې، چې د افغانستان تحصیلي نظام اړتیا وړ برخو کې به له لوړو زده‌کړو وزارت سره همکاري وکړي. ښاغلي ندیم د یاد سازمان له چارواکو غوښتي، چې د دغه سازمان د غړو هېوادونو په مرسته د فوق لېسانس برنامو لپاره متخصص استادان افغانستان ته راجلب کړي، د مجهزو لابراتوارونو په تکمیل، د یاد سازمان غړو هېوادونو سره د علمي همکاریو رامنځ ته کولو او زېربنا برخو کې همکاري وکړي.