د افغان ځوانانو لپاره د نوښتګر اقتصاد جوړولو اړتیا

په افغانستان کې د ځوانانو نفوس د ټولنې د تر ټولو لویې پانګې په توګه ګڼل کېږي. دغه ځواکمن قشر کولای شي که مناسب فرصتونه او لارښوونې ورته برابرې شي، د هیواد اقتصادي وضعیت له ستونزو څخه د پرمختګ پر لور بدل کړي. افغانستان د لسیزو جګړو او کړکېچونو سره مخ و، خو اوس داسې یو فرصت په لاس کې لري چې ځوانان یې کولی شي د نوښت او سوداګرۍ په برخه کې د پام وړ بدلونونه رامنځته کړي.
نوښتګر اقتصاد هغه سیستم دی چې د ټکنالوژۍ، ابتکار او خلاقیت په مرسته رامنځته کېږي. په دې برخه کې د ځوانانو رول خورا مهم دی، ځکه چې هغوی د نوې ټکنالوژۍ او عصري مهارتونو په زده کړه سره کولای شي د هیواد په اقتصادي پرمختګ کې اساسي ونډه واخلي. د افغانستان ځوانانو د ډېرې مودې لپاره د بې روزګارۍ، نا امنۍ او کډوالۍ له ستونزو سره مبارزه کړې، خو که مناسب شرایط او فرصتونه ورته برابر شي، نو هغوی به د دې توان ولري چې د اقتصادي ودې یو مهم بنسټ رامنځته کړي.
افغان سرپرست حکومت ته په کار ده چې د تخنیکي او مسلکي زده کړو په برخه کې جدي پانګونه وکړي. ځوانانو ته باید په نړیواله کچه د سیالۍ وړ مهارتونه او عصري روزنې وړاندې شي، تر څو هغوی وکولای شي نه یوازې د هیواد دننه اقتصادي وده چټکه کړي، بلکې په نړیوالو بازارونو کې هم د افغانستان نوم لوړ کړي. د دې تر څنګ، حکومت باید ځوانانو ته د نوي سوداګرۍ د پیل کولو لپاره لازم امکانات او اسانتیاوې برابرې کړي، لکه د مالي مرستو برابرول، د کوچنیو کاروبارونو لپاره د پورونو ورکول، او د سوداګرۍ چاپیریال اسانول.
د نوښتګر اقتصاد جوړولو لپاره یواځې د حکومت ملاتړ بسنه نه کوي. خصوصي سکتور هم باید په دې برخه کې مهم رول ولوبوي. د نوي سوداګرۍ ملاتړ، د نوښتونو تشویق او په ځوانانو باندې پانګونه، هغه لارې دي چې د خصوصي سکتور له لارې به د ځوانانو اقتصادي وضعیت ته پرمختګ ورکړي. خصوصي شرکتونه او پانګوال باید په ځوانانو کې د نوښتګر فکر او ابتکار ملاتړ وکړي، او د هغوی د سوداګرۍ نظرونو ته وده ورکړي.
سربېره پر دې، نړیوال بنسټونه او د نړیوالو همکاریو پروګرامونه هم کولی شي په افغانستان کې د ځوانانو د اقتصادي وضعیت د ښه کولو لپاره مهمه ونډه ولري. نړیوال مرستندویه بنسټونه کولی شي د روزنې، پانګونې او د کار پیدا کولو په برخه کې د ځوانانو ملاتړ وکړي. د نړیوالو همکارانو مرسته به د دې لامل شي چې ځوانان وکولای شي په نړیواله کچه فکر وکړي او د نوي ټکنالوژۍ په مرسته نوښتګره سوداګري رامنځته کړي.
د نوښتګر اقتصاد جوړول به ځوانانو ته دا فرصت ورکړي چې خپل نظرونه او مهارتونه په عملي توګه پلي کړي. په دې سره به نه یوازې د ځوانانو د بې روزګارۍ کچه کمه شي، بلکې د مهاجرت مخه به ونیول شي، او دوی به هڅه وکړي چې په خپل هیواد کې پاتې شي او د خپل هیواد د ودې لپاره کار وکړي. دغه نوښتګر اقتصاد به د هیواد تولیداتو کچه لوړه کړي، او په پایله کې به افغانستان وکولای شي په سیمه ییزو او نړیوالو بازارونو کې ځانته ښه ځای پیدا کړي.