د اوبو کمښت له امله د هلمند او کندهار ولایتونو برېښنا پرې شوې ده

د هلمند ولایت په کجکي بند کې د اوبو کمښت له امله د هلمند او کندهار ولایتونو برېښنا پرې شوه ده. د هلمند د اطلاعاتو او فرهنګ ریاست مرستیال مولوي محمدقاسم ریاض وايي چې د هلمند په کجکي بند کې د اوبو کموالي له امله چارواکو پرېکړه وکړه چې پر هلمند او کندهار ولایتونو  برېښنا بنده کړي. خو هغه وویل، کله چې اوبه په بند کې زیاتې شې بېرته به برېښنا په عادي ډول هلمند او کندهار ته ورکړل شي. د کجکي بند د ۱۵۱ میګاواټه برېښنا تولید وړتیا لري. د دغه بند برېښنا د کندهار ولایت مرکز او ځینو سیمو او دغه راز د هلمند مرکز او سنګین، موسی کلا او کجکي ولسوالیو ته ورکول کېده. دا په داسې حال کې ده چې د وچکالۍ له امله د هېواد په نورو ولایتونو کې هم خلک له ستونزو سره مخ شوي دي.