د برېکس هېوادونو ۱۷مه سرمشريزه د جولای په اوومې نېټې د برازيل په ريو دي جنيرو ښار کې پای ته ورسېده.
د دغې سرمشریزې ګډونوالو پر دواملرونکي پرمختګ تمرکز کړی، له يو اړخيز سوداګريزو تدبيرونو سره يې مخالفت ښودلی او په ګډه يې د څو اړخیزم د ساتنې غږ پورته کړی دی. دغه راز دوی د دې سرمشريزې (( د ريو دي جنيرو اعلاميه)) هم خپره کړې او د مصنوعي ځيرکتيا او له اقليمي بدلون سره د مقابلې په شمول څو برخو کې يې سندونه لاسليک کړي دي.
چين په دغې سرمشريزې کې د نړيوالې ادارې د اصلاحاتو په هکله د نړيوالې سولې او ارامۍ د ساتلو، د اقتصادي خوځنده ځواک د راپارولو او د تمدني تبادلې او تجربو د زده کولو وړانديزونه کړي او د برېکس هېوادونو له همکاريو او د نړۍ د سراسري جنوب هېوادونو د پرمختګ لپاره يې څو اقدامات اعلان کړي دي.
نړيوالې ټولنې د چين د یادو وړانديزونو او اقداماتو تود هرکلی کړی دی.
دغه سرمشريزه په برېکس کې د اندونيزيا او لسو همکاريزو هېوادونو تر شاملېدو وروسته ترسره شوه.
د چين دولت رئيس شي جين پینګ په ۲۰۲۴م کال کې د برېکس په کازان سرمشريزې کې د پراخو همکاريو د باکيفيته پرمختګ د پرمخبېولو دريځ څرګند کړ او هم يې د دغو همکاريو د باکيفيته پرمختګ د ملاتړ لپاره اته ماده ييز تدبیرونه او اقدامات اعلان کړل.
شنونکي وايي، د شي جين پينګ ياد دريځ او اقداماتو د برېکس د همکاريز ميکانيزم بنسټ نور هم ټينګ کړی دی.
اوسمهال دغه همکاريز ميکانيزم د لوی برېکس پر داسې چوکاټ بدل شوی، چې پکې د اسيا، افريقا، لاتينې امريکا او اروپا لس غړي هېوادونه شامل دي، عمومي نفوس يې د نړۍ نيمه برخه او عمومي اقتصادي اندازه يې د نړۍ دېرش سلنه نيسي او د توليداتو د اخيستلو وړتيا يې د اوو صنعتي هېوادونو د ورته وړتيا په پرتله ډېره پياوړې ده.
روېټرز خبر ورکړی، چې د برېکس د غړو هېوادونو په زياتېدو سره د يادې سرمشريزې ډيپلوماتيکه اغېزه هم مخ په زياتېدو ده.
د برېکس ۱۷مه سرمشريزه په داسې حال کې ترسره شوه، چې نړۍ کې ډېر بدلونونه راغلي دي.امريکا د روان کال له پيل راهيسې د نړۍ د ګڼو هېوادونو پر وړاندې سوداګريزې جګړې پيل کړي او دغې کړنې يې نړيوال سوداګریز نظام او ميکانيزم او برېکس هېوادونو ته زيانونه رسولي دي. په ورته وخت کې د نړۍ په ځينو نورو سیمو کې جګړې روانې دي او د څو اړخيز ميکانيزم اغېز کمزوری شوی دی.
د برېکس غړي په دې اند دي او لازمه يې بولي، چې په نړيوال اداري سيسټم کې بايد اصلاحات راشي.
برېکس د نړۍ د سراسري جنوب هېوادونو د لومړۍ جبهې مسؤليت لري او همدغه چاره پرمخ وړي.
چين به د برېکس هېوادونو د همکاريو د مهم ځواک په توګه څنګه خپل رول ولوبوي؟
سوله د نړۍ لپاره د لمر او هوا په څېر ارزښت لري. چين د برېکس له نورو هېوادونو سره يو ځای د سولې د لټون لپاره ډېرې هڅې کوي.
چين په وروستيو کې د فلسطين او اسرائيل د مسئلې په هکله ځانګړې انلاين سرمشريزه ترسره کړه او د اوکراين د بحران د حل وفصل لپاره يې د سوله ييز ملګري په نوم ډله جوړه او د اسرائيل او ايران ترمنځ د شخړې د درېدو په اړه یې يوه ګډه اعلاميه خپره کړه.
چين تېر کال د سوله ييز برېکس وړاندیز وکړ او موخه یې ترې دا وه، چې د خونديتوب د ساتلو لپاره ټول غړي هېوادونه ګډ ساتونګي وګرځي.
چين د برېکس په سږنۍ سرمشريزې کې يو ځل بيا پر دې ټينګار کړی، چې د دغه ميکانيزم غړي هېوادونه دې پر عدالت ټينګار ولري او په سوله ييزو لارو چارو دې شخړې او کشالې له منځه یوسي او د حقيقتونو له مخې دې د ستونزو د لرې کولو لارې چارې ولټوي.
که برېکس هېوادونه د چین ياد دريځ ته په کتو چارې ترسره کړي، نو په نړيوالو تودو مسئلو کې به رغنده رول ولوبوي او نړۍ ته به مثبت، ثابت او پياوړی ځواک ورکړي.
د برېکس هېوادونو همکاريز ميکانيزم له دوو لسیزو راهيسې د نړۍ د سراسري جنوب هېوادونو د يووالي او همکارۍ طلايي برانډ ګرځېدلی دی.
که څه هم اوس په نړۍ کې ژور بدلونونه روان دي، خو بیا هم د دغه ميکانيزم په چوکاټ کې د برېکس هېوادونو ملګري په زیاتېدو دي او د ځينو شنونکو په اند، چين په دغه جريان کې ډېر مهم رول لوبوي.
دوی باور ښيي، چې چين به په نژدې راتلونکې کې په لازياتو اقداماتو سره د برېکس د لويو همکاريو د لا پياوړتيا لپاره هڅو ته دوام ورکړي او بدلېدونکې نړۍ ته به مثبت ځواک او انرژي ورکړي.
