‏ د بښنې نړیوال سازمان: هندي پولیس دې نیول شوي افغانان خوشې کړي

د بښنې نړیوال سازمان د هند له پولیسو غوښتي هغه افغان کډوال خوشې کړي چې په کابل کې پر یوه ښوونیز مرکز د وروستي برید په غبرګون کې یې لاریون کړی وو او نیول شوي دي. د بښنې نړیوال سازمان کې د افغانستان د برخې کمپاینرې سمیرا حمیدي په خپله ټویټر پاڼه کې د هند لپاره د دې سازمان د برخې یو ټویټ ایښی چې په‌کې د هند له پولیسو د دغو لاریون کوونکو د خوشې کېدو غوښتنه شوې ده. تېره جمعه د کابل پر کاج ښوونیز مرکز برید وشو چې لسګونه کسانو ته پکې مرګ ژوبله واوښته. د دغه برید پر وړاندې د کابل په ګډون په یو شمېر ولایتونو کې او هېوادونو کې لاریونونه وشول چې تر ډېره په‌کې د هزاره ګانو وژنې دې بندې شي، شعارونه ورکول کېدل.