د تورخم دروازه به، سبا د مسافرو د تګ راتګ پر مخ هم پرانیستل شي

د تورخم دوازه پرون ناوخته د (چهارشنبې) په ورځ د سوداګریزو موټرو پرمخ له څه کم یوې میاشتې بندښت وروسته بېرته پرانیستل شوې ده. په تورخم کې د سرپرست حکومت کمیسار ویلي، چې دغه لاره د د دوه اړخیزې سوداګرۍ لپاره پرانېستل شوې او سبا د (جمعې) په ورځ به مسافرو ته هم د راتګ اجازه ورکړل شي. دغه لاره ۲۵ ورځې وړاندې هغه مهال د هر ډول تګ راتګ پر مخ وتړل شوه، چې له افغانستان لوري د پوستې جوړولو له چارو سره پاکستاني ځواکونو مخالفت وښود او د دواړو لوریو ترمنځ نښتې وشوې. پر تورخم دروازه له تېرو ۲۵ ورځو راهیسې د هر ډول سوداګرۍ او پلي تګ راتګ بند و. پرون ناوخته پاکستاني چارواکو اعلان وکړ، چې د تورخم لاره یې د دوه اړخیزې سوداګرۍ لپاره پرانېستې او ډیر ژر به پلی تګ راتګ هم پیل شي.