د چين پسرلنی اختر د ۲۰۲۴م کال د ډسمبر په ۴مې نېټې د ملګرو ملتونو د يونيسکو لخوا د غيرمادي کلتوري ميراثونو په نړيوال لېست کې شامل شوی دی. د يونیسکو تر يادې پرېکړې وروسته لومړی پسرلنی اختر د ۲۰۲۵م کال د جنورۍ په ۲۹مه نېټه و، چې د نړۍ په ګوټ ګوټ کې یې خوشحاله فضا احساس شوې ده او د سارو په توګه یې په سينګاپور کې د اختريزو توکو تود بازار، په ماليزيا کې د زمري نڅا، د الپاين (Alpine) يخچال کې د مار کال ځانګړې څراغي ننداره او ځيني نور يادولی شو. دغه راز د بېلا بېلو هېوادونو انټرنېټ کاروونکو د ريډنوټ په شمول پر مختلفو ټولنيزو رسنيو د پسرلني اختر په وياړ د چين ميډيا ګروپ ماښامنۍ هنري ننداره کتلې، چيني ځانګړي دودونه يې احساس کړي او يو بل ته يې د نوي مار کال مبارکي او نيکې هيلې وړاندې کړې دي.
دا ټول د دې څرګندويي کوي، چې د چين کرنيز نوی کال اوس يو نړيوال اختر ګرځیدلی دی.
پسرلنی اختر د چين تر ټولو لرغونی او مهم دوديز اختر بلل کېږي.
ملګرو ملتونو د ۲۰۲۳م کال په پای کې د چين پسرلنی اختر د رخصتۍ په توګه ټاکلی او د ۲۰۲۴م کال په پای کې يې د غير مادي کلتوري ميراثونو په نړيوال لېست کې ځای ورکړی دی.
ګڼو هېوادونو او نړيوالو سازمانونو په دې وروستيو کې په جلا جلا توګه يو لړ غیر مادي کلتوري نندارتونونه، نندارې او فعاليتونه ترسره کړي، چې د سارو په توګه یې د زمري نڅا، اورلوبې، د بيا راټولېدنې ډوډۍ او هنري ننداره يادولی شو او په دې سره نړيوالو د اختر خوشحالي او چيني دودونه احساس کړي دي.
د ملګرو ملتونو د يونيسکو سازمان عمومي مديرې اودري ازولای د سږ پسرلني اختر په مناسبت ويلي، چې پسرلنی اختر د غير مادي کلتوري ميراثونو په ليست کې تر شاملېدو وروسته اوس د نړۍ مروج اختر ګرځېدلی او ټولې نړۍ ته یې د خوشحالۍ او سولې پيغام ورکړی دی.
پسرلنی اختر د ټولې نړۍ لپاره د چيني ملت د منلو وړ کلتوري نښه ده. د نړۍ نژدې ۲۰ هېوادونو پسرلنی اختر د قانوني رختصۍ په توګه ټاکلی دی.
د امريکا په سانفرانسيسکو کې له ګلانو ډکو موټرونو، د جرمني په فرانکفورت کې معبدي بازارونو او د جاپان په ناګاساکي کې د زرګونو ډیوو ننداره، د ډېرو خلکو او په تېره بیا انټرنېټ کاروونکو پاملرنه راجلب کړې ده.
د نړۍ يو پر پنځمه نفوس د هر کال د پسرلني اختر په ورځو کې په مختلفو فعاليتونو د دغه اختر لمانځنه کوي او د چيني ملت غوره دوديز کلتورونه احساسوي. پسرلنی اختر اوس يوه نړيواله کلتوري پېښه بلل کېږي او د مختلفو هېوادونو د خلکو ترمنځ تفاهم او دوستي هڅوي او زياتوي.
نړيوال د پسرلني اختر په لمانځنې سره يو پرانيستی او ټولشموله چين هم احساسولی شي. چين ميډيا ګروپ هر کال د پسرلني اختر په وياړ ماښامنۍ هنري ننداره خپروي. سږ کال د نړۍ شاوخوا ۲۰۰ هېوادونو او سيمو څه باندې ۲۹۰۰ خبري رسنيو دغه ماښامنۍ هنري ننداره خپره کړې او يا یې په اړه راپورتاژونه جوړ او خپاره کړي، د اړوندو خبرونو د لوست اندازه یې له ۱۷۳۸ ميليونو ځلو اوښتې او په بهر کې د پسرلني اختر وېډيوګانو د کتلو اندازه ۵۲۰ ميليونو ځلو ته رسېدلې او ښايي دغه اندازې نورې هم زياتې شي.
مار په چيني کلتور کې د هوښيارۍ، ټينګښت او ژوند نښه بلل کېږي.
نړيوال په داسې حال کې د نوي مار کال پسرلنی اختر لمانځي، چې ځمکنۍ کره لا هم د جغرافيايي نښتو په شمول له يو لړ پېچلو او جدي ننګونو سره مخ ده. سږ کال د ملګرو ملتونو د جوړېدو له ۸۰مې کليزې سره برابر دی. نړۍ په دغه ځانګړي کال کې د مار په څېر ژوند او خوځنده ځواک ته سترګې په لار ده، څو نړيوال د ننګونو پر وړاندې زړورټوب وښيي، په هوښيارۍ مخ ته ولاړ شي او لا ښکلې اينده پرانيزي.
د ملګرو ملتونو سرمنشي انټونيو ګوټرېش د نوي مار کال د پسرلني اختر په وياړ خپلې وينا کې له چين او چينایانو څخه مننه کړې، چې له ملګرو ملتونو سره يې همکارۍ کړي او څواړخيزم او نړيوالې همکارۍ يې پاللې دي. نوموړي پر نړيوالو غږ کړی، چې په روان ستونزمن وخت کې د سولې، برابرۍ او عدالت په پار ټينګې ارادې ولري.
