د مزار- شبرغان ګازو پایپلین پروژې چارې پیل شوې

د مزار- شبرغان ګاز پایپلین پروژې چارې د ۶۰۹ میلیونو افغانیو په لګښت پیل شوې. د ګاز پایپلین د یادې پروژې د پیل په مراسمو کې د کانونو او پټرولیم سرپرست وزیر وویل، چې یاده پروژه له ۵۲ کلونو وروسته یو ځل بیا عملي کېږي، چې د جوزجان ولایت د خواجه ګردک د سیمي څخه بیا د بلخ ولایت تر کوډ و برق پورې د ۹۵ کیلو مترو په اوږدوالي د ۶۰۹ میلیونو افغانیو په لګښت د دریو کلونو په موده کي بشپړېږي، چې ټول لګښت یې د سرپرست حکومت له بودجې څخه ورکول کېږي. شیخ شهاب الدین دلاور زیاته کړه، چې د یاد پاپیلین تر بشپړېدو وروسته به د کوډ و برق فابریکې کارونه لا چتکتیا پیدا کړي او هڅه کوي، څو د مزار شریف ښار ټولو کورونو ته د همدې پایپلین په وسیله ګاز ورسوي. د یادونې وړ ده، چې دغه پایپلین په ٢٤ ساعتونو کې١٧٠ زره متر مکعب ګاز د ٥٠ اتمسفیر فشار سره د انتقال وړتیا لري.