د م.م امنیت شورا نن د افغانستان په اړه غونډه کوي

په افغانستان کې د ملګرو ملتو مرستندویه پلاوي( یوناما) پر خپله ایکس پاڼه لیکلي چې ټاکل شوې، د ملګرو ملتو امنیت شورا نن د افغانستان په اړه غونډه وکړي. په دې لیکلي بیان کې ویل شوي، چې د یوناما مشره روزا اتونبایوا به دې غونډې ته وینا وکړي. په امنیت شورا کې د افغانستان په اړه دا د سږکال څلورمه غونډه ده او په داسې وخت کې جوړیږي چې یوناما د تېرې سې شنبې په ورځ د بشري حقونو د نړیوالې ورځې په مناسبت ویلي و، که څه هم په افغانستان کې وسله والې نښتې کمې شوې ، خو بشري حقونه له خطر سره مخامخ شوې دي. امنیت شورا هم په افغانستان کې بشري وضعیت په ځانګړي ډول د ښځو او نجونو وضعیت د ډيرې اندیښنې وړ بللی دی.