نړیوال بانک په افغانستان کې د ۶۰۰ میلیونو ډالرو په ارزښت پروژې لغوه کړې. د نړیوال بانک مشرتابه په تازه پرېکړه کې ویلي چې په افغانستان کې د نجونو د ښوونځیو د تړل کېدو په غبرګون کې دوی په دغه هېواد کې د کرنې او روغتیا په برخه کې خپلې څلور سترې پروژې چې شاوخوا ۶۰۰ میلیونه ډالر لګښت پرې راځي لغوه کوي.
دغه بانک وايي دوی له نړیوالو بنسټونو سره په اړیکه کې په افغانستان کې فعالیتونه ترسره کوي، نو که د نړیوالې ټولنې غوښتنې په افغانستان کې نه منل کېږي نو دوی هم د ورته پروژو له عملي کولو په شا کېږي. نړیوال بانک تر دې وړاندې ویلي وو، چې په افغانستان کې به ځينې پراختیايي پروژې پیلوي خو دا پروژې به د افغان حکومت پر ځای د خیریه موسسو له لوري عملي کېږي.
