د ولسي جرګې غړي: د سرپرستانو د کار دوام غیر قانوني دی او فساد ډېروي

د ولسي جرګې غړي وايي د سرپرستانو د کار دوام د فساد د پراختیا سبب کېږي. د ولسي جرګې غړو په نننۍ غونډه کې یو ځل بیا له ولسمشر غني غوښتي چې د کابینې غړي دې د باور رایې اخیستو لپاره ورمعرفي کړي او په دې توګه دې په اداراتو کې د سرپرستۍ دود ختم کړي. د ولسي جرګې رییس میر رحمان رحماني وویل چې د سرپرستانو د کار دوام د فساد د پراختیا او کمکارۍ سبب کېږي. هغه همدا راز وویل چې د سرپرستانو د کار دوام له قانون سره هم په ټکر کې عمل دی او افغان حکومت باید دې مسئلې ته متوجه وي ځکه ددغه کسانو کار او پرېکړې غیر قانوني دي. ولسي جرګه داسې مهال د سرپرستۍ د ختمولو غوښتنه کوي چې همدا اوس هم د کابینې ګڼ غړي سرپرستان دي. له دې ډلې ځینو یې له ولسي جرګې د باور رایه نه ده اخیستې او ځینې یې تر اوسه ولسي جرګې ته د باور رایې اخیستو لپاره نه دي ورمعرفي شوي.