د کابینې پرېکړه؛ قطر ته دې د هوایي ډګر د مدیریت تړون د لاسلیک مهلت په ګوته شي

د افغانستان د ا.ا د کابينې اقتصادي کمېسيون د بهرنيو چارو وزارت ته امر کړی چې د قطر د بهرنيو چارو وزارت ته دې د کابل د هوايي ډګر د مديريت د تړون اخيستلو مهلت په ګوته کړي. په ياده ناسته کې چې نن د رييس الوزرا د مرستيال ملا عبدالغني برادر په مشرۍ جوړه شوې وه، دغه راز د کورنيو چارو او سوداګرۍ وزارتونو او د استخباراتو رياست ته امر شوی چې په هوايي ډګر کې دې د پانګوالو لپاره د عاجلو ويزو د ورکړې لپاره بورډ جوړ کړي. د افغانستان ا.ا په داسې حال کې د قطر د بهرنيو چارو وزارت ته د کابل د هوايي ډګر د مديريت د تړون لپاره د وخت د ټاکلو پريکړه کوي چې دوحه او انقره له مياشتو راهيسې د دې چارې لپاره له افغان لوري سره په مذاکراتو بوخت دي. د ا.ا چارواکو تر دې وړاندې ويلي وو چې د هوايي ډګرونو د مديريت د تړون پر متن يې له ترکيې او قطر سره خبرې روانې دي خو په وينا يې چې د پام وړ پايله نه لري.