روان بشري ناورین؛ د سیمې او نړۍ امنیت ته خطرونه جوړوي

په افغانستان کې روان انساني ناورین د سیمې او نړۍ امنیت ته خطرونه جوړولی شي. ډوېچوېلې انګلیسي برخې د افغانستان په اړه له ځینو نړیوالو تحلیلګرانو سره خبرې کړې دي او دوی ټینګار کړی چې نړۍ باید د امنیت او سیمه ییزې سولې لپاره په افغانستان کې د روان بشري ناورین مخنیوی وکړي. دوی وایي نړیواله ټولنه دمګړی پر اوکراین بوخته ده او ددې هېواد په اړه د یووالي او اتحاد کنفرانسونه جوړوي، خو که په دې منځ کې افغانستان هېر شي نو ستر بشري ناورین به ټولې نړۍ ته ګواښونه جوړ کړي. دوی وایي چې لوږه، کمزوری اقتصاد، کډوالي او دې ته ورته مسئله پخپله د ناامنیو او بې ثباتیو له پراختیا سره مرسته کوي چې له همدې امله باید نړیوال په افغانستان کې د بشري ناورین د ختمولو لپاره لاس په کار شي او خپل مسوولیت ادا کړي.