روسیه: اوکراین دې بې مانا مقاومت بس کړي

د روسیې د بهرنیو چارو وزیر سرګي لاوروف وايي، که اوکراین د مسکو غوښتنې ونه مني، ددې هېواد پوځ به دا مسله له پوځي لارې حل کړي. د روسیې د بهرنیو چارو وزیر ویلي چې د اوکراین حکومت باید پرېکړه وکړي چې په دغه هېواد کې جګړه څومره دوام وکړي او که کیف د روسیې غوښتنې ونه مني، دا موضوع به د روسیې د پوځ له خوا حل شي. ټاس خبري اژانس د لاوروف له قوله ویلي چې اوکراین کولی شي بې مانا مقاومت هره شېبه بس کړي. د اوکراین ولسمشر ولادیمیر زلینسکي بیا ویلي، روسیه کولی شي د خپلو ځواکونو په ایستلو او د اوکراین د حاکمیت، خپلواکۍ او ځمکنۍ بشپړتیا په بېرته ساتلو سره دغه جګړه پای ته ورسوي.