روسیې، المان او ایران پر افغان سوله خبرې کړې دي

ایران، روسیې او المان په افغانستان کې پر سولې او د تاوتریخوالي پر کموالي خبرې کړې دي. د ایراني رسنیو د راپورونو له مخې د افغانستان لپاره ددغه هېواد د بهرنیو چارو وزارت ځانګړي استازي ابراهیم طاهریان له خپلو الماني او روسي سیالانو سره پر افغان سوله خبرې کړې دي. دوی ټینګار کړی دی چې باید په افغانستان کې تاوتریخوالی کم کړل شي او د سولې لپاره دې کوټلي ګامونه اوچت شي. یادو درېیو هېوادونو ټینګار کړی چې له افغانستان سره د سولې په برخه کې خپلو همکاریو ته ادامه ورکوي او دې ته لېواله دي چې دلته د کلونو اوږده جګړه د خبرو له لارې پای ومومي.