رینا امیري د عربي هېوادونو سازمان سره د افغانستان په اړه خبرې کړې

د افغان ښځو او بشري حقونو په برخو کې د امریکا ځانګړې استازې رينا اميري د عربي هېوادونو د همکارۍ سازمان سره د نړیوالې ټولنې لخوا افغانستان سره پر همکاریو خبرې وکړې. د قطر دولتي اژانس خبر ورکړی چی مېرمن رينا اميري پرون د سعودي په پلازمينه ریاض کې د عربي هېوادونو د همکارۍ سازمان سرمنشي ډاکټر نايف فلاح مبارک الهجرف سره ليدلي دي. سرچينې زياته کړې، په دې لیدنه کې دواړو لورو افغان ولس سره د نړیوالې ټولنې لخوا په بېلا بېلو برخو کې د همکاريو پر څرنګوالي او نورو برخو کې پر مرستو خبرې وکړې. د عربي هېوادونو د همکارۍ سازمان سرمنشي د افغانستان په سوله، امنیت او ثبات کې د نړیوالې ټولنې پر رول او همکاریو ټینګار وکړ. د يو بل خبر له مخې، دا مریکا ځانګړې استازې رینا اميري په ریاض کې د سعودي عربستان د بهرنیو چارو وزارت مرستیال ولید الخيريجى سره هم لیدلي دي. د سعودي د بهرنيو چارو وزارت په یوه خبرپاڼه کې ویلي، چې دوی د دواړو هېوادونو د اړیکو پر پراختیا او د افغانستان په تړاو پر ګډو همکاريو خبرې وکړې .