د چين د کمونېست ګوند د مرکزي کمېټې عمومي منشي او دولت رئيس شي جين پينګ د جون د ۲۶مې نېټې په سهار په پلازمېنې بېجينګ کې د کمبوډيا د خلکو ګوند او سنا مجلس له مشر سمديچ هون سين سره لیدلي دي.
شي جين پينګ د کمبوډيا د خلکو ګوند د جوړېدو د ۷۵مې کليزې په مناسبت هون سين ته مبارکي ويلې او هيله يې څرګنده کړې، چې د کمبوډيا د ملي پرمختګ چارې به د دغه ګوند په رهبرۍ نورې هم ګړندۍ شي.
نوموړي ويلي، چين له ګاونډيو هېوادونو سره په اړيکو کې کمبوډيا ته لومړيتوب ورکوي او د ملي حاکميت او امنيت د ساتنې او له ملي شرايطو سره سم د پرمختګ په برخه کې د کمبوډيا له کوښښونو ملاتړ کوي.
هغه زیاته کړې، چين به له کمبوډيا سره په ګډه د سولې د ساتنې، پرمختګ او سوکالۍ د رامنځته کولو او د چين – کمبوډيا د ګډ برخليک ټولنې د جوړولو لپاره کوښښونه وکړي.
هون سين ويلي، کمبوډيا به د نړيوالو حالاتو له بدلونونو سره سره له چين سره دوستانه اړيکو ته دوام ورکړي او د يو چين پېژندنې اصل به وساتي.
نوموړي ويلي، کمبوډیا به له چین سره د اقتصاد، امنیت، دفاع او د خلکو ترمنځ د تبادلې په برخو کې ژورې همکارۍ وکړي.
هغه له مخابراتي درغلیو سره مبارزه د کمبوډیا لپاره لومړیتوب بللی او په خبره یې، هېواد به یې په دې برخه کې له چين سره ژورو همکاریو ته دوام ورکړي.
هون سين زياته کړې، کمبوډیا د رئيس شي لخوا د وړاندې شوو څلورو نړیوالو نوښتونو کلک ملاتړ کوي او د پلي کولو په برخه کې به یې له چين سره ګډ کوښښونه وکړي او د سیمه يېزې او نړیوالې سولې او سوکالۍ لپاره به مثبت رول ولوبوي
