د چين دولت رئيس شي جين پينګ د جون د ۲۶مې نېټې په سهار په پلازمېنې بېجينګ کې د بنګله دېش له لومړي وزير طارق رحمان سره ليدلي دي.
دواړو مشرانو د چين او بنګلادېش د نوې زمانې د ګډ برخليک ټولنې د جوړولو اعلان کړی، چې له مخې به یې دواړه هېوادونه خپلمنځي اړيکې لوړې کچې ته ورسوي.
شي جين پينګ ويلي، بېجينګ د چين او بنګله دېش د اړيکو پراختيا ته ډېر اهميت ورکوي او د ملي خپلواکۍ، حاکميت او ځمکنۍ بشپړتيا په ساتنه کې د بنګله دېش له کوښښونو ملاتړ او په کورنيو چارو کې يې له بهرنۍ لاسوهنې سره مخالفت کوي.
نوموړي ويلي، چين به د حکومتدارۍ په برخه کې له بنګله دېش سره د تجربو تبادلې پياوړې کړي، په ټولو کچو کې به ورسره نږدې تګ راتګ وساتي، ستراتيژيکې اړيکې به ورسره ژورې او سياسي متقابل باور به ورسره پياوړی کړي او د اصلي ګټو او مهمو اندېښنو په برخه کې به متقابل ملاتړ ته دوام ورکړي.
طارق رحمان د چين د کمونېست ګوند د ۱۰۵مې کليزې په مناسبت رئیس شي جين پينګ ته مبارکي ويلې ده.
نوموړي ويلي، چين يو لوی هېواد دی او د بنګله دېش لپاره په بهرنۍ پاليسۍ کې مهم مقام لري او په خبره یې، بنګله دېش به د یو چین پېژندنې اصل وساتي او په نړیوالو او سیمه ییزو چارو کې به له چین سره د همغږۍ او همکارۍ د پیاوړتیا ملاتړ وکړي.
طارق زیاته کړې، بنګله دېش به له چين سره په ګډه د دوهمې نړیوالې جګړې د بریا لاسته راوړنې او د ملګرو ملتونو په مرکزيت نړیوال نظام وساتي.
