صبغت الله د ۴۰ هېوادو ترمنځ د ریاضي سیالۍ ګټونکی شو

له جګړه ځپلي ولایت هلمنده یوه افغان زده کوونکي د نړۍ د څلوېښتو هېوادونو د زده کوونکو ترمنځ د ریاضي په سیالۍ کې لومړی مقام ګټلی دی. د نړیوالو رسنیو د راپورونو له مخې په دغه علمي سیالۍ کې له څلوېښتو هېوادونو څلور زره زده کوونکو ګډون کړی و. صبغت الله د هلمند ولایت اوسېدونکی دی چې د هرات په افغان-ترک ښوونځي کې زده کړې کوي. د نوموړي پلار په هلمند ولایت کې د فلزکارۍ هټۍ لري خو په خپل زوی یې په هرات کې زده کړې کوي. هغه رسماً د روانې میاشتې په درېیمه نېټه دغه جایزه وګټله او د صبغت الله دا بریا په ټولنیزو رسنیو کې د افغانانو له تاوده هرکلي سره مخ شوې ده. افغان چارواکو او د افغانستان علمي بنسټونو نوموړي ته د مبارکۍ پیغامونه خپاره کړي دي. پخواني ولسمشر حامد هم په یوه پیغام کې ویلي چې دا د افغانانو لپاره ستر ویاړ دی او د نوموړي کورنۍ ته یې مبارکي ورکړې ده. ولسمشر کرزي یو ځل بیا له هرې افغان کورنۍ غوښتي چې خپل ماشومان وروزي، زده کړې ورباندې وکړي او د هېواد ښه راتلونکې یوازې د علم او زده کړو له لارې جوړېدلی شي.