په افغانستان کې د جګړو او د وسله والو طالبانو لاس ته د یو شمېر ولایتونو د مرکزونو د لوېدو په دوام، تازه دغه ډله ادعا کوي چې سمنګان ولایت مرکز ایبک یې هم تر خپلې ولکې لاندې راوستې دی.
بلخوا د سمنګان مرستیال والي صفت الله سمنګاني هم تاییدوي چې د دغه ولایت مرکز ایبک ښار د طالبانو لاس ته لوېدلی دی. نوموړی وايي، طالبان وروسته له هغه ایبک ښار ته ننوتل، چې د ولسي پاڅونوالو مهم قوماندان سناتور محمداصف له خپلو شاوخوا ۲۵۰ کسانو سره طالبانو ته تسلیم شو. د سمنګاني په خبره، حکومتي ځواکونو له طالبانو سره سختې جګړې وکړې، خو وروسته یې د قومي مخورو د غوښتنې او د ولسي خلکو د تلفاتو د مخنیوي په موخه له جګړې لاس واخیست او دغه مرکز د طالبانو لاس ته ولوېد.
د وسله والو طالبانو ویاند ذبیح الله مجاهد هم ويلي چې له شبرغان، تالقان، کندوز، سرپل او زرنج ښارونو وروسته، ایبک د هېواد شپږم ښار دی چې په روانه اونۍ کې یې تر خپلې ولکې لاندې راولي.
افغان چارواکي بیا که څه هم په پرله پسې توګه د ولایتونو پر سقوط چوپ دي، خو ولسمشر غني تېره ورځ د هېواد د سیاسي او جهادي مشرانو او ملي شورا له ريیسانو سره د هېواد د روان امنیتي وضعیت په اړه خبرې کړې دي. له ارګه په خپره شوې خبرپاڼه کې راغلي، چې په دغه کتنه کې د افغان ځواکونو او جمهوریت د بقا او تداوم د ملاتړ ترڅنګ د ولسي پاڅونوالو د پیاوړتیا او تجهیز په اړه پرېکړه شوې ده. د ارګ په اعلامیه کې ویل شوي: «په دغه کتنه کې د امنیتي او دفاعي ځواکونو، د جمهوریت د بقا او تداوم د ملاتړ ترڅنګ د دښمن د هجوم پر وړاندې د ولسي پاڅونونو د چټک انسجام، پیاوړتیا او تجهیز پرېکړه وشوه.»
د ولسمشرۍ ماڼۍ د معلوماتو له مخې، په غونډه کې د ملي مصالحې شورا مشر ډاکتر عبدالله عبدالله، د جمهوري ریاست دویم مرستیال سرور دانش، پخواني جهادي مشر عبدالرب رسول سیاف، د ولسمشر غني پخواني لومړي مرستیال مارشال عبدالرشید دوستم، کریم خلیلي، حاجي محمد محقق، محمد یونس قانوني، د ولسي جرګې مشر میر رحمان رحماني او د مشرانو جرګې مشر فضل الهادي مسلمیار ترڅنګ یو شمېر لوړپوړو چارواکو هم ګډون کړی و.
د یادو شپږو ښارونو له سقوط سره جوخت، د کندهار، هرات او لښکرګاه ښارونه هم په دې وروستیو کې د وسله والو طالبانو د پراخو بریدونو شاهد وو، خو کورنیو چارو وزارت وايي چې د یادو ښارونو د نیولو په اړه یې د طالبانو پلان شنډ کړی دی.
د ولایتونو پر مرکزونو د طالبانو له بریدونو سره هممهاله ولسمشر غني تېره اونۍ د هېواد د روان امنیتي وضعیت په اړه د ملي شورا ځانګړې غونډې راوبلله. نوموړي په دغه غونډه کې وویل، دوی دې پایلې ته رسېدلي چې وسله وال طالبان پر تلپاتې او عادلانه سولې هېڅ باور نه لري او له دغه ډلې څخه غواړي چې د واقعي مذاکراتو او جګړې څخه یو انتخاب کړي.
غني وویل، چې افغانستان اوسمهال د طالبانو او د هغوی د ملاتړو له بې ساري یرغل سره مخ دی، خو ډاډ یې ورکړ چې د هېڅ ورانکارې ډلې پر وړاندې به تسلیم نه شي.
