طالبانو د پنټاګون په وروستیو څرګندونو غبرګون ښودلی

طالبانو د امریکا هغه ادعا رد کړه چې ویلي یې دي، طالبان د تاوتريخوالي کمولو او القاعدې سره د اړيکو پرېکولو په ګډون له امریکا سره د سولې تړون کې پر خپلو ژمنو نه دې درېدلي. طالبانو ویلي، دوی د دوحې هوکړې ته ژمن دي. د وسله والو طالبانو ویاند ذبیح الله مجاهد پر خپله ټویټر پاڼه لیکلي، چې د دوحې تړون عملي کول د روانې لانجې یوازنی حل دی او له امریکا څخه یې غوښتي چې دوی هم دغه تړون مراعت کړي. له دې مخکې د امریکا د دفاع وزارت ویاند جان کربي ويلي وو چې طالبان د تاوتريخوالي کمولو او له القاعدې سره د اړيکو پرې کولو په ګډون د دوحې تړون کې شوې ژمنې نه دي پوره کړي.