عبدالله: تاوتریخوالی د منلو نه دی طالبان باید مذاکراتو ته راوګرځي

د ملي مصالحي عالي شورا رییس عبدالله عبدالله که څه هم په دوحه کې د بین الافغاني مذاکراتو د تماس ډلو ترمنځ د ناستو هرکلی کړی دی خو ټینګار کوي چې دا پرمختګ بسنه نه کوي. هغه ویلي، طالبانو ژمنه کړې وه چې مذاکرات به په صادقانه توګه مخته وړي خو په دې وروستیو کې یې د خبرو مېز پرېښی دی او په خبره یې اړتیا ده چې د سولې خبرې بېرته پیل او ګړندۍ شي. عبدالله کابل ته د مارشال دوستم د هرکلي په غونډه کې د خبرو پر مهال دغه راز یو ځل بیا د اوربند ټينګښت لومړیتوب بللی او ټینګار یې کړی دی چې طالبان باید خبرو اترو ته حاضر شي. نوموړي ویلي چې طالبانو د افغانانو هدفي وژنو ته دوام ورکړی دی او غوښتنه یې کړې ده چې هر څه ژر باید دا لړۍ پای ته ورسول شي.