فراه؛ د شیخ ابو نصر فراهي بندر د سپینو ځمکو د اجارې لړۍ پیل شوه

د فراه د کرنې ریاست مسوولینو خبر ورکړی، چې د دغه ولایت په شیخ ابو نصر فراهي بندر کې د اجارې لپاره د سپینو ځمکو د وېش لړۍ پیل شوې ده. د فراه د کرنې، اوبو لګولو او مالدارۍ رئیس مولوي پیر محمد حلیمي رسنیو ته ویلي چې په دې بهیر کې د ۷۲۳ شرکتونو، استوګنیزو خونو او هټیو لپاره سپینې ځمکې د قانوني طرزالعمل له مخې په اجاره ورکول کېږي. د هغه په وینا، له دې ډلې ۴۰ شرکتونو، ۶۱۹ استوګنیزو خونو او ۶۴ هټیو ته ځمکې د ځانګړې کمېټې له لوري د لومړنیو بیو تر ټاکلو وروسته په شفاف ډول اجاره ورکول کېږي. نوموړي له ټولو هېوادوالو، په ځانګړي ډول سوداګرو او پانګه‌والو غوښتي چې په دې بهیر کې ګډون وکړي او ویلي یې دي چې د فراه ترڅنګ د نورو ولایتونو اوسېدونکي هم کولای شي د قانون له مخې دغه ځمکې په اجاره ترلاسه کړي.