لاوروف: سرپرست حکومت دې د رسمیت پېژندنې شرایط پوره کړي

د روسیې د بهرنیوچارو وزیر سیرګي لاوروف وايي، مسکو به د افغانستان سرپرست حکومت تر هغه مهاله په رسمیت ونه پېژني چې د یوه ټولشموله حکومت د جوړولو په ګډون د نړیوالو معیارونو په اساس خپل مکلفیتونه ترسره نه کړي. لاوروف دا څرګندونې بېګا د ملګرو ملتونو په مقر کې په یوه خبري غونډه کې وکړې. هغه وویل چې طالبان یو حقیقت دی او باید خبرې ورسره وشي، خو زیاته یې کړه چې اساسي بشري حقونو، له هغې ډلې د نجونو او ښځو حقونو ته درناوی هم د رسمیت پېژندنې له مهمو معیارونو څخه دی. د افغانستان سرپرست حکومت تر اوسه په دې اړه څه نه دي ویلي.