لغمان کې د ۱۹ پروژو رغنیزې چارې پیل شوې

د څه باندې ۴۹ میلیونه افغانیو په لګښت، په لغمان کې د اوبو ذخیرو او پایپ سیکم ۱۹پروژو رغنیزې چارې پیل شوې. د اوبو او انرژۍ وزارت د یوې خبرپاڼې په استولو سره ویلي چې د لغمان د قرغیو ولسوالۍ د وکیل خان بڼ وړې ګلي او ګل غونډۍ سیمو کې د اوبو ذخیرو او پایپ سکیم ۱۹ پروژو رغنیزې چارې د ۴۹ میلیونه ۲۸۸ زره ۱۳۹ افغانیو په لګښت پیل شوې. په دغو پروژو کې ګڼ شمېر کسانو ته د کار زمینه برابره شوې ده او چارې به یې د درېیو میاشتو په موده کې بشپړې او ګټې اخیستنې ته به وسپارل شي. ویل شوي چې د یادو پروژو چارې د «ډبلیو‌اف‌پي» سازمان په مالي لګښت او د لغمان د اوبو او انرژۍ ریاست تر څارنې لاندې پرمخ وړل کېږي.