له اړمنو افغانانو سره یو ځل بیا د مرستو غوښتنه وشوه

د خوړو نړیوال پروګرام یوځل بیا له بسپنه ورکوونکو وغوښتل چې په افغانستان کې اړمنو کسانو ته د خوړو په برابرولو کې د دې پروګرام لاسنیوی وکړي. د دې پروګرام د افغانستان څانګې نن پر خپله ټویټر پاڼه لیکلي، چې تېر کال په افغانستان کې ۲۳ میلیونه کسانو د خوړو پروګرام مرستې ترلاسه کړې او دا کار یوازې د بسپنه ورکوونکو لکه د اسټرالیا، چین، کویټ، فنلنډ او بریتانیا په څېر هېوادونو د سخاوتمندانه مرستو له لارې ممکن شوی و. د خوړو نړیوال پروګرام زیاته کړې چې سږ کال یې د بودجې د سخت کمښت له کبله پر ۱۰ میلیونه وګړو د خوړو مرستې درولي او له بسپنه ورکوونکو غواړي چې ورسره سمدستي مرسته وکړي.