له پاکستانه نږدې ۶ لکه افغان کډوال را ستانه شوي دي

پاکستاني رسنۍ وایي، د ۲۰۲۴ کال د مې تر ۲۹مې نېټې له پاکستانه د ټولو ستنو شویو افغان کډوالو شمېر ۵۹۰۴۴۵ ته لوړ شوی او د ستنېدو لړۍ لاهم روانه ده. د مالوماتو له مخې د مې له ۲۰مې څخه د مې تر ۲۹مې پورې د ۱۳۲۰۶ ستنو شویو افغانانو له ډلې ۶۴۷۸ یې نارینه، ۲۹۸۷ یې ښځې او ۳۷۴۱ یې ماشومان وو. د کډوالو او راستنېدونکو چارو وزارت تېره ورځ په خپره کړې خبرپاڼه کې ویلي، چې تېر کال کې له ایران، پاکستان او نورو هېوادونو څخه ۹۵۳ زره کډوال په خپله خوښه افغانستان ته راستانه شوي دي. تر دې وړاندې د پاکستان د ایالتونو او سرحدي سیمو وفاقي وزارت په پاکستان کې د راجستر شويو افغان کډوالو د اوسېدو موده د مې میاشتې تر ۳۰مې نېټې پورې وغځوله؛ خو دغه موده هم ورځ پایته رسېږي.