ملا برادر: مذاکرات باید په پوره حوصله مندۍ مخ ته یوړل شي

د طالبانو د مشر ملا هبت الله سیاسي مرستیال نن په دوحه کې د بین الافغاني خبرو په پرانیستغونډه کې د خبرو پر مهال وویل چې د مذاکراتو لار به له ډېرو خنډونو ډکه وي نو ددې اړتیا ده چې دغه بهیر په پوره حوصله مندۍ او زغم مخ ته یوړل شي. هغه ټینګار کړی چې دوی د سولې او په افغانستان کې د یوه اسلامي نظام غوښتونکي دي او دا د ټولو افغانانو غوښتنه ده. هغه له امریکا سره د سولې پر شوې هوکړه هم خبرې وکړې، دده په وینا طالبانو پر دې هوکړه عمل کړی دی او امریکا ته هم په کار ده چې د سولې پر هوکړه عمل وکړي. ملا برادر وویل چې دوی به د جګړې د پای ته رسېدو او افغانستان د پرمختګ لپاره مذاکراتو ته ادامه ورکوي.