حامد کرزی: هیله لرم پیل شوي مذاکرات د بېرحمانه جګړو د پای سبب شي

پخوانی ولسمشر حامد کرزی وایي تمه لري چې پیل شوي مذاکرات په افغانستان کې د بېرحمانه خونړیو جګړو پېټۍ د افغانانو له اوږدو ټيټ کړي. پخواني ولسمشر د مذاکراتو د پیل په مناسبت په خپاره کړي پیغام کې ویلي په مذاکراتو کې ددواړو لورو استازو او پلاوي ته په کار ده چې د لنډ مهاله او شخصي یا حزبي ګټو پر ځای د افغانستان اوږدمهاله او دایمي ګټو ته لومړیتوب ورکړي، دلته د جګړو د پای ته رسېدو لپار کار وکړی، له رامنځ ته شوي فرصت دې پوره ګټه پورته کړي او په پوره حوصله مندۍ دې د پیاوړي افغانستان لپاره بحثونه وکړي. پخواني ولسمشر دغه راز ویلي چې که افغانان په خپلو کې یووالي ته سره ورسېږي نو دلته به پردۍ مداخلې او جګړې ختمې شي او افغانستان ته به د یوه پیاوړي او خپلواک هېواد په توګه راڅرګند شي چې د سیمې او نړۍ لپاره به ګټور وي.