ملګري ملتونه ښکېلو لورو ته:ملکي تلفات ډېر شوي، ژر تر ژره تاوتریخوالی ودروئ

ملګرو ملتونو په افغانستان کې په چټکه توګه د تاوتریخوالي د کمېدو غوښتنه کړې ده. په افغانستان کې د ملګرو ملتونو مرستندویه دفتر یا یونما په یوه خپره کړې اعلامیه کې ویلي دي چې په افغانستان کې د جګړو او تاوتریخوالي بار د ملکي وګړو پر اوږو دی. په خبرپاڼه کې راځي چې په لښکرګاه او نورو ځایونو کې د طالبانو په وروستیو بریدونو کې ملکي وګړو ته مرګ ژوبله اوښتې او خپرې شوې شمېرې د اندېشنې وړ دي. د سرچینې په خبره د تاوتریخوالي اوسني بهیر دا اندېښنې ډېرې کړې چې یو ځل به بیا په افغانستان کې د ملکي وګړو لپاره ناورین رامنځ ته شي او مرګ ژوبله به ډېره شي. ملګرو ملتونو ویلي چې تاوتریخوالی د سولې خبرو ته زیان رسوي او ښه به وي چې ښکېل لورې نور د نړیوالو او افغانانو غوښتنه ومني او تاوتریخوالی کم کړي. سرچینې ویلي افغان جګړو د خبرو له لارې د ختمېدو وړ ده او ټول اړخونه ددغه بهیر ملاتړ کوي نو د جګړو او تاوتریخوالي د ژر تر ژره درېدو اړتیا لیدل کېږي. ملګرو ملتونو تر دې وړاندې هم له ښکېلو لورو غوښتي چې ژر تر ژره روانه جګړه ودروي او د سولې لار خپله کړي.