ناټو د سولې پر فعالانو وروستي بریدونه غندلي دي

د افغانستان لپاره د ناټو ملکي استازي د ترهګرۍ د قربانیانو د یادښت په مناسبت په یوه پیغام کې د سولې او بشري حقونو په فعالانو وروستي بریدونه غندلي دي. سټیفانو پونتیکورو پر خپل ټوېټر دا فعالان هغه خلک بللي چې د باعزته سولې په لټه کې دي. نوموړي له ترهګرۍ سره د مبارزې په برخه کې له افغانانو او د افغانستان له امنیتي او دفاعي ځواکونو سره د ناټو د همکارۍ ډاډ ورکړی دی. افغانستان یو له هغو هېوادونو دی چې په ترهګریزو بریدونو کې یې ګڼ خلک له لاسه ورکړي دي. په کابل کې د ملګرو ملتونو د مرستندویه ماموریت یوناما د راپور په اساس د ۲۰۲۰ کال په لومړۍ نیمايي کې نږدې دري نیم زره افغان ملکیانو ته مرګ ژوبله اوښتې ده.