ننګرهار کې د ۱۵ چکډېمونو جوړولو چارې بشپړې شوې

د ننګرهار د کرنې، اوبولګولو او مالدارۍ ریاست مسوولین وایي، چې په دغه ولایت کې د ۱۵ چکډېمونو د جوړولو چارې بشپړې شوې دي. د مسوولینو په خبره په یاد ولایت کې به د پاتې ۷ چکډېمونو د رغولو چارې هم په نږدې ورځو کې پیل شي. د دې پروژې له مخې دغه چکډېمونه د باراني اوبو د زېرمه کولو او د ترځمکې لاندې اوبو د کچې لوړولو په موخه د اچین، ګوشتې، هسکې مېنې، پچیراګام، کامه، مهمندرې او بټي کوټ ولسوالیو کې جوړ شوي دي. د کرنې ریاست مسوولین وایي چې د دې پروژې په تطبیق سره به نه یوازې د سیمې د اوبو ستونزه هواره شي بلکې د سلګونو اوسېدونکو لپاره به د کار فرصتونه هم برابر شي.