نورستان او غزني کې وروستیو سیلابونو ۱۴ کسان مړه کړي

د افغانستان ا.ا وايي‌ چې په نورستان او غزني ولایتونو کې د سېلابونو له امله ۱۴ کسان مړه شوي او ۱۱ تنه نور ټپيان شوي دي. باختر اژانس راپور ورکړی دی چې د نورستان په واما ولسوالۍ کې د وروستیو سېلابونو له امله نهه کسان مړه شوي او دوه نور ټپیان شوي دي. په ورته وخت کې په غزني ولایت کې هم د سېلابونو له امله د پنځو کسانو د مړینې او دوو کسانو نورو د ټپي کېدو خبر ورکړل شوی دی. د غزني ولایت د اطلاعاتو او فرهنګ رییس مولوي حبیب الله مجاهد ویلي چې په دغه ولایت کې د راوتلو سېلابونو له امله ۵۰ کورونه هم ویجاړ شوي دي. دا په داسې حال کې ده چې د افغانستان د هوا پيژندنې ادارې د اټکل له مخې نن ورځ هم د هېواد په ۱۳ ولایتونو کې د بارانونو او سېلابونو راوتلو امکان شته دی.