هېواد کې د تېلو او ګازو بیې په کم‌سارې توګه لوړې شوي

په افغانستان کې د پټرولو، ډېزلو او اوبلن ګاز بیې لوړې شوې چې د خلکو او موټرچلوونکو اندېښنې یې زیاتې کړې دي. کابل ښاریان وايي، د سون‌توکو لوړې بیې د کورنیو پر محدودو عوایدو دروند بار اچولی دی. د بازار له ارزونو سره سم، په ځینو سیمو کې مایع ګاز د رسمي نرخ خلاف تر ۱۰۰ افغانیو او یا هم زیات پلورل کېږي. موټرچلوونکي وايي، د تېلو د بیو لوړوالی دوی اړ باسي چې کرایې لوړې کړي، څو خپل لګښتونه پوره کړي. ورته مهال خصوصي سکټور خبرداری ورکوي چې د سون‌توکو دوامدار لوړوالی به د ترانسپورټ، خوراکي توکو او د ژوند پر نورو لګښتونو مستقیم اغېز وکړي.