ولسي جرګه: د امنیتي ادارو د کمزوري مدیریت له امله وضعیت ترینګلی دی

د ولسي جرګې غړي وایي چې د امنیتي ادارو د مدیریت د کمزورۍ له امله امنیتي وضعیت کړکېچن شوی دی. د ولسي جرګې ګڼو غړو د نننۍ غونډې په امتیازي ساعت کې د خبرو پر مهال وویل چې د امنیتي ادارو په مشرتابه کې کمزوري او د مسوولیت پر وړاندې بې پروایي ددې سبب شوې چې جګړې دوام وکړي او د هېواد وضعیت ورځ تر بلې کړکېچن شي. وکیلانو دغه راز نیوکه وکړه چې د امنیتي ادارو مسوولین د روان وضعیت په اړه ولسي جرګې او ولس ته وضاحت نه ورکوي او دا مسئله د اندېښنې وړ ده. دوی ټینګار وکړ چې امنیتي ځواکونه پیاوړي دي او د جګړو وړتیا لري خو په مدیریت او دوی ته د امکاناتو د برابرولو په برخه کې کمزوري ددې سبب شوې چې وضعیت د ښه کېدو پر ځای ترینګلی شي. د ولسي جرګې غړو تر دې وړاندې هم ټینګار کړی چې د امنیتي او دفاعي ادارو په مشرتابه او مدیریت کې د کمزورۍ له امله امنیتي وضعیت ترینګلی شوی دی.