پنټاګون: تر دې دمه مو زر کسه سرتېري له هوايي ډګر وتلي دي

امریکا وایي له کابل هوايي ډګر یې د خپلو سرتېرو د ایستلو لړۍ هم پيل کړې ده. د امریکا ددفاع وزارت ویاند جان کربي په یوه خبري کنفرانس کې ویلي چې امریکا شاوخوا ۵۵۰۰ عسکر د تخلیې ماموریت د مخ ته بېولو لپاره افغانستان ته لېږلي وو چې دمګړی له دې ډلې زر کسه یې بېرته وتلي دي. کربي وایي د تخلیې ماموریت تر څنګ له کابل هوایي ډګر د امریکايي ځواکونو د ایستلو پروسه هم پيل شوې ده او تر ټاکل شوې نېټې به بشپړه شي. تر دې وړاندې امریکا ددې غوښتونکې وه چې په کابل کې یې د ځواکونو ماموریت تر یوې مودې تمدید شي خو دا غوښتنه یې د طالبانو له مخالفت سره مخ شوه او ټینګار یې وکړ چې تر ټاکلې نېټې وروسته په افغانستان کې د امریکايي ځواکونو حضور ورته د منلو نه دی.