په تېرو دریو میاشتو کې پاکستان کې ۱۰۰۰ تنه افغانان زنداني شوي

د ملګرو ملتونو د کډوالو عالي کمیشنرۍ د روان ۲۰۲۴ کال په دریو میاشتو کې د پاکستاني امنیتي ادارو له خوا د شاوخوا ۱۰۰۰ افغان کډوالو د نیولو او په زندان کې د اچولو خبر ورکړی دی. د ملګرو ملتونو د کډوالو عالي کمیشنرۍ پرون ناوخته په یو راپور کې ویلي چې په پاکستان کې د امنیتي ادارو له خوا په نیول شویو افغان کډوالو کې ۷۴۶ قانوني اسناد نه لرونکي او د کارتونو لرونکي او ۲۰۱ تنه نور د کارتونو لرونکي شامل دي. د دغې کمیشنرۍ د وینا له مخې د مارچ په تیره میاشت کې د افغان کډوالو د نیولو کچه کې د فبرورۍ د میاشتې پرتله ۱۲۱ سلنه زیاتوالی راغلی وو. د ملګرو ملتونو د کډوالو عالي کمیشنرۍ شمیرنې ښيي چې د ۲۰۱۶ میلادي کال را وروسته د پاکستان د امنیتي ادارو له خوا د افغان کډوالو د نیولو او بندیانولو لړۍ پراخه شوې ده.