په قطر کې د طالبانو او افغان حکومت د مذاکراتي ټیمونو ترمنځ خبرې له خنډ او ځنډ سره مخ شوې دي. د وروستیو معلوماتو له مخې، د دواړو لورو د ټیمونو ترمنځ پر ځينو مواردو ژور اختلاف موجود دی او له هڅو سره سره دغه اختلافات نه دي حل شوي چې له امله یې بین الافغاني مذاکرات ځنډېدلي دي. تر دې دمه خبرې پر طرزالعمل روانې دي، خو په دغه کړنلاره کې داسې موارد شته چې دواړه لوري ورباندې د نظر اختلاف لري. له دې سره جوخت نه یوازې دا چې طالبانو تازه تبلیغاتي مانورې پیل کړې دي، بلکې تر څنګ یې خپل بریدونه هم ډېر کړي او عملاً د جګړې ډګر تود دی.
د سپټمبر په ۱۲ مه په دوحه کې د افغان حکومت او طالبانو د پلاوي ترمنځ مخامخ مذاکرات پیل او د یو لړ مراسمو په ترڅ کې د مذاکراتو دا لړۍ پرانیستل شوه. تر هغه وروسته دواړو لورو واړه ګروپونه وګومارل او هغه ته یې د تماس ډلې نوم ورکړ چې د مذاکراتو لپاره به تګلاره ټاکي او د مذاکراتو د بهیر لپاره به اصول رامنځ ته کوي، خو دغه ډلې تر دې دمه کومې پایلې ته نه دي رسېدلي او ترمنځ یې اختلافات د دې لامل شوي چې بین الافغاني مذاکرات له ځنډ او خنډ سره مخ شي.
د طالبانو د مذاکراتي پلاوي غړو بیا تور پورې کړی چې حکومتي لوری په لوی لاس په مذاکراتو کې خنډونه جوړوي او هڅه یې دا ده چې خبرې وځنډېږي. د طالبانو د مذاکراتي پلاوي غړي مولوي خیرالله خیر خواه په خپله یوه تازه مرکه کې ویلي چې د مذاکراتو لپاره باید د طالبانو او امریکا توافق د اصل په توګه وټاکل شي او پرېکړې به د حنفي فقهې پر بنسټ کېږي. هغه زیاتوي چې افغان حکومت ورسره دا مسایل نه مني. د ده په وینا: ((د طالبانو او امریکا هوکړه باید د اصل په توګه ومنل شي، ځکه د همدې هوکړې پر بنسټ بین الافغاني مذاکرات پيل شوي دي، دا هوکړه وخت په وخت له افغان حکومت سره شریکه شوې ده، دوی منلې ده، نو که دا نه منل کېږي، نو بیا مذاکرات پر کومه مسئله د څه له مخې پيلېږي؟))
د طالبانو د مذاکراتي پلاوي بل غړي مولوي عبدالسلام حنیفي هم ویلي چې حکومتي لوری په مذاکراتو کې خنډونه رامنځ ته کوي. د ده په وینا، طالبان په رښتینې توګه غواړي چې مذاکرات مخ ته لاړ شي او روانه جګړه د خبرو له لارې حل شي، خو افغان حکومت د ګڼو اصولو له منلو ډډه کوي. د ده په خبره: ((موږ په رښتینې توګه غوښتل چې ژر تر ژره باید په اجنډا کې داخل شو. موږ غوښتل یوه ګډه اجنډا ژر مخ ته یوسو)).
مولوي حنفي وایي چې دمګړی اختلاف پر دوو مواردو دي. یو دا چې مذاکرات د دوحې د هوکړې پر بنسټ مخ ته وړل کېږي او بل هم په فقهي برخه کې اختلاف دی. هغه ټینګار کړی چې طالبان پر خپل دريځ ولاړ دي او حکومتي لوري ته هم په کار ده چې د خنډونو له جوړولو ډډه وکړي.
بلخوا د افغان حکومت د مذاکراتي پلاوي غړي هم وایي چې طالبان د اختلافونو حل ته تیاری نه ښيي او د خپلو خبرو پر منل کېدو ټینګار کوي. د دوی په خبره، طالبان خپلې ۱۹ کلنې جګړې ته جهاد وایي، خو افغان پلاوی یې مخالفت کوي، طالبان دغه راز د اساسي قانون د بدلون په لټه کې هم دي، په داسې حال کې ولسمشر غني تېره ورځ هم اساسي قانون د هېواد ملي وثیقه یاده کړې او په هغه کې یې هر ډول اختلاف رد کړی دی.
بلخوا د ملي مصالحې عالي شورا رییس بیا وړمه ورځ ناوخته له افغان مذاکراتي پلاوي سره خبرې کړي او دوی ته یې نوې سپارښتنې کړې دي. د ده په خبره، دغه ډله باید په هېواد کې روانه جګړه ختمه کړي او له خپل ټول قوت په استفادې باید د هېواد د ملي ګټو د ساتنې لپاره هڅه وکړي.
