پښتین: افغانستان ته هم پر تګ راتګ پاسپورټ نه منو

د پښتون ژغورنې غورځنګ مشر منظور پښتین چې د چمن په پرلت کې یې د ګډون پر مهال وینا کوله وویل، پاکستان په قانون، اسلام او جرګو کې د پښتنو حق نه ورکوي خو پښتانه به د خپلو حقونو ترلاسه کولو لپاره له هرې ممکنې لارې کار اخلي. نوموړی وايي، نه یواځې چې د سپین بولدک ـ چمن تر منځ پر دروازه پاسپورټ نه مني، بلکې پر ډیورنډ فرضي کرښه د افغانستان او پاکستان تر منځ پر ټولو لارو پاسپورټ نه مني. نوموړي ویلي، د چمن پرلت د حق غوښتنې یو لوی غږ دی او د دې غږ د لویولو لپاره به پښتون ژغورنې غورځنګ له لوري په ټول پاکستان کې لاریونونه تر سره کړي. منظور پښتین د پاکستان له لوري د سپین بولدک ـ چمن پر دروازه د پاسپورټ د حتمي کېدو په غبرګون په جوړ شوي پرلت کې په ۳۹ مه ورځ ګډون وکړ او داسې ویل کیږي چې نوموړی به د دوو ورځو لپاره په دغه پرلت کې ګډون وکړي. پښتین وايي، دا د حق غوښتنې یو لوی حرکت دی باید د تر لاسه کولو لپاره یې مخته لاړ شو، او د حق غوښتنې له مبارزې څخه به نه په شا کیږو.